Mahmud Namozov - Oq tulpor qo'shiq matni

Oq tulporim bor edi,
Beklar unga zor edi, (x2)
Ot demasman, u menga
Ham do`stu ham yor edi.

Yolin o`psam tiz cho`kib,
Tizzamdan suv ichardi.
Chuh, desam yer changitib,
Osmonlarga uchardi. (x2)

Oq tulporim bor edi-ey,
Beklar unga zor edi. (x2)

Hovlimizda bir oqshom
Qarindoshlar to`lishdi,
To`y bahona otimdan
Ayirmoqchi bo`lishdi.

Otam: yigitsan, o`g`lim,
Uylanmasang or, dedi.
Qiz yarashar quchoqqa,
Otga nima bor, dedi.

Oq tulporim bor edi-ey,
Beklar unga zor edi. (x2)
Ot demasman, u menga
Ham do`stu ham yor edi.

Otxonadan boshlandi
Yor uyiga yo`lakcha.
Kechir, yorim, ne qilay,
Otga mehrim bo`lakcha.

Qoldim ikki o`t aro –
Go`shangada dildorim.
Kelin kelgan kechadan
Arazladi tulporim.

Bormi bizday oshiqlar
Bahorimda kuz yig`lar.
Qizni quchsam, ot yig`lar,
Otni quchsam, qiz yig`lar.

Bir bor o`psam xotinni,
Uch bor o`pdim otimni.
Jonim qaqshab yasharman,
Kimga aytay dodimni?

Oq tulporim bor edi-ey,
Beklar unga zor edi.
Ot demasman, u menga
Ham do`stu ham yor edi. (x3)

Yordan kechdim otni deb,
Elga bo`ldim ermaklar. (x2)
Qaydan bilsin ot qadrin
Ot minmagan erkaklar.