Ahad Qayum - Hammasi joyida

Jahl qilar eriga xotin,
Arzimagan maosh oyida.
Umr o'tib ketmoqda lekin,
Aslida hammasi joyida.

Baland emish qo'shnining tomi,
Lift bor emish uning uyida.
Sabab yo'qdir asab buzgani,
Aslida hammasi joyida.
Vasvasaga tushgan odamlar,
Borin sotib sochar to'yida.
To'ydan keyin ko'zida namlar,
Aslida hammasi joyida.

Ko'zgu quchib yig'lar bir ayol,
Ajin paydo bo'lmish yuzida.
Yosh umrini kim qildi zavol,
Aslida hammasi joyida.
Dilda boshqa rejalar tuzib,
Tilda esa boshqa qoida.
Yashang do'stlar shukrona qilib,
Aslida hammasi joyida.

Kim kimdan balandroq yashaydi,
Kim kimning aslida poyida.
Bu dunyo bozorga o'xshaydi,
Aslida hammasi joyida.
Kim egan osh go'shi sal ko'proq,
Kimnikining farqi moyida,
Hech kim shukr demaydi biroq,
Aslida hammasi joyida.

Kim kuladi kimning ustidan,
Kim yig'laydi kimning ko'yida,
Kim qochadi kimning dastidan,
Aslida hammasi joyida.
Ko'zinggizni oching do'stlarim,
Qadrlanggiz baxtning borida.
Bir kun kelib so'ng kech bo'lmasin,
Aslida hammasi joyida.