Ahad Qayum - Omadli odamda dushman ko'p bo'ladi

Boshingga baxt qushi qo'nsa ogoh bo'l,
Do'st bilan dushmanning doim farqin bil,
Ortingdan g'iybatlar bo'lar tayyor tur,

Atrofingni o'rar xushomadgo'ylar,
Omadli odamga dushman ko'p bo'lar.

Kimdir bilar ba'zan, kimdir bilmaydi,
Kimdir mehnatingni ko'zga ilmaydi,
Barchaning ko'nglini olib bo'lmaydi,

Ko'pchilik bir xato qilishing poylar,
Omadli odamga dushman kop bolar.

Qochish kerak ikki yuzlamachidan,
Yuzi boshqa so'zlar, boshqa ichidan,
Kim foyda izlaydi kimning kuchidan,

Yolg'on maqtovlarning so'ngin kim bilar,
Omadli odamga dushman ko'p bo'lar.

Hamma senda hurmat kutar e'tibor,
Sen kimga zorsanu, kim sengadir zor,
Eshiging yuqlarlar qator va qator,

Oshno kirishmoqqa barcha intilar,
Omadli odamda dushman ko'p bo'lar.

Kimdir seni g'iybat qilsa ham sen jim,
Odamlardan nolib yig'lama ko'nglim,
Baxting qadriga yet ey Ahad Qayum,

Mevali darxtga toshlar otilar,
Omadli odamgha dushman ko'p bo'lar.